نشرت ريما الرحباني ابنة السيدة فيروز والراحل عاصي الرحباني صورة تجمع والدتها وشقيقيها زياد وهلي الرحباني وذلك عبر حسابها الرسمي على موقع التواصل الاجتماعي "فيسبوك". الصورة التي نشرتها ريما الرحباني والتقطتها بعدسة جوالها تأتي خلال إحياء الذكرى السنوية لرحيل عاصي الرحباني.

وأكدت ريما أن الصورة التقطت يوم أمس الثلاثاء وقالت في تعليقها: "فيروز (إمّي) زياد (أخوي) وهلي الرحباني (أخوي) الثلاثاء 21 حزيران 2022 في تمام الساعة 8 و 21 دقيقة.. كنيسة السيّدة - المحيدثة - بكفيا كنيسة العاصي.. القداس السنوي عن راحة نفس عاصي (أبوي) وليال الرحباني (إختي)". وكانت ريما قد نشرت أمس أيضاً صورة تظهر من خلالها والدتها فيروز وهي تمسك بيد شقيقها "هلي" وذلك في إطار مجموعة من المواضيع والذكريات التي تقوم بنشرها ريما إحياء لذكرى رحيل والدها.

الجدير بالذكر ان "هلي"، ابن فيروز، من ذوي الاحتياجات الخاصة وهو يعاني من الشلل، وأصم وأبكم. ونادرا ما تظهر له صورة في الاعلام. وكشفت ريما انها كثيرا ما تساءلت عن سبب اعاقة اخيها "هلي" وقالت: "ليه "هلي" خلق بهالعيلة؟ وليه صار معو هيك؟ وليه؟ وليه؟ ولَيْهات كتيرة ضل إسألها.. ونفسي ما ترتاح من الوَجع ومن الأسئلة!"

وتابعت ريما: "وما كانت تِرضى نفسي ولا تِستَكين .. وربنا شو؟ بيَعطي وبياخد؟ ربنا ليه راضي بهالظلم كلّو على هالارض الواسعة؟ ليه ما وزّع كَرمو على كل الناس بالعَدل والتَساوي؟ ليه؟ ليه؟ اي اي ما بنكر إنّي مرّات "كتير بكيت وصلّيت انا وحالي ووحدي إحتجّيت!" وزعلت منّو وما عدت احكيه..بس مش من زمان لقيت الجواب".

مش اللي مغطسة بتيجان الدهب ولا بالصلبان المشطوبة، ما حدا علّمني ما حدا ربّاني ما حدا لزَمني.. كون هيك! وأضافت: "هلي" بيناتنا نحنا بالذات ت نضَل ماشيين عَ الارض! "هلي" حمانا من ضو الشهرة والمال والجاه والتكبُّر والتعجرُف وكل ملذّات الحياة الفانية، "هلي" نقّى نفوسنا وقلوبنا وطهّرها! "هلي" رد عنّا ضربات الحقد الماكر والحسد والغيرة، "هلي" خلانا نضل مجموعين وخلّا هالبيت ما يعيش فيه الا الحُب، وخلا قلوبنا توزّع حب وفرح عالناس كل الناس، خلانا مرتبطين بالناس البُسطا اللي بيشبهونا ومنشبهن! مش عن عبث بِكره الحياة الإجتماعية اللي مليانة تصنّع وكذب وسطحية وظهور وحفلات وعهر وكفر وبَطر ونجومية! مش عن عبث ما برتاح إلا مع الناس الطيّبين بالضياع الخجولة والفلاحين والزرّاعين والحطّابين والعمّال الكادحين.. لاء.. منّي شيوعيّة.. لاء انا مسيحيّة وهيك بتكون المسيحيّة الحقيقيّة!.

واستطردت: "هلي" اللي ما بيِحكي وما بيِسمع وما بيِمشي هوّي اللي علّمني كل هول.. علّمني سامح وحب وأعطي أهلي عمري وحياتي متلما هوّي عطانا، وبحسب قناعة عاصي وكلام عاصي إلي "هلي وزّع ذكاه عليكي إنتي وزياد وليال بالتساوي! ولهيك لازم كتير تحبّوه لهلي!" أي يا بيّي هيّاني عم قول اللي بدَّك ياني، إنتَ وساكٍن العالي، قولو "هلي" يا ملاك البيت.. الله يحرسك ويطوّل عمرك ويخلّيك بركة هالبيت!